Soscripcion libre R. Martí

Al nom de tota la còla contributritz, soi aürós de vos anonciar que, dins qualques jorns, al començament de decembre, va sortir un libre collectiu en omenatge a Robèrt Martí, auta figura de l’occitanisme, que nos daissèt mai d’un an fa.

Aqueste libre, que se publica a las edicions de l’Institut d’Estudis Occitans, vòl simplament dire l’òme e son òbra. Testimoniatges e analisis evòcan la riquesa de l’òme, sas facetas multiplas e sos multiples talents, la figura d’una persona fòra de çò comun… 

L’omenatge s’impausèt a tota la còla coma una evidéncia, per remembrar tot çò que Robèrt nos balhèt e nos balha encara, tot çò que li devèm. Es un biais de lo mercejar e de li dire qu’amb el, fidèlament, continuarem de ganhar país…

De fòtos e d’illustracions de qualitat acompanhan de tèxtes escrits en mai d’una lenga (occitan, catalan, espanhòl, francés) per: Claudi Alranq, Josep Arasa Ferrer, André At, Mirelha Braç, Joaquín Castillo Blanco, Bernat Cauhapè, Joan-Loís Cortial, Olivièr Daillut, Josiana Daunís-Martí, Joan-Claudi Forêt, Eric Fraj, Jacme Gaudàs, Roger Harvey, Sèrgi Javaloyès, Sèrgi Labatut, Florant Mercadièr, Danièl Rifà, Alan Roch, Estefe Ros, Joan-Claudi Sèrras, Claudi Sicre, Joan Thomàs, Muriel Vernières, Sèrgi Viaule, Joan Vilòta.

Se volètz compartir aqueste omenatge, e – malgrat la pena – la fòrça e la jòia qu’emanan d’aqueste trabalh collectiu, podètz encara soscriure dusca-s-a la fin de novembre (gràcias a la fuèlha de soscripcion en pèça junta o en anant sul site de l’Institut d’Estudis Occitans).

E mercés per avança de plan voler difusar l’informacion!

En esperant vos retrobar aviat, plan lo vòstre,

Eric FRAJ.

0 12