La Vida
Lo CD dels 50 ans de cançon d’Eric Fraj
50 ans d’una aventura que comenci timidament a 14 ans, a Bordèu, e que me mena pertot ont la vida me vòl plan menar, d’una plaça de vilatge a la scèna d’un grand festival, d’una sala de bar a la d’un centre cultural, del Teatre Lumière de Göttingen (Alemanha) al Palau de la Música de Barcelona, en passant per Bretanha, París, Corsega, lo País Valencian, Marròc… 50 ans d’un camin ont me ronci sense autra fòrça que la d’un inalterable desir de cantar e de dire, d’existir per la musica (que coneissi a pena), de reparar lo mond e sas injustícias, en començant per la que tòca lo país d’Occitania e sa lenga-cultura. L’empont es mon escòla artistica. E los milièrs d’encontres pel camin, mon escòla d’umanitat e d’umilitat, mon sol ben vertadièr…
Cinquanta ans. E lo cant me ten totjorn! Es son desir que me buta encara a vos ofrir aquestes 50 títols, dont 44 inedits, ont ressonan mon gost de l’eclectisme e mas lengas del còr. Ombras e luses, espèrs e renonciaments, safranadas e rotas balisadas, andronas e vastes orizonts, amors e òdis, realitat e imaginaris: i es question de la vida. E per ma votz i cantan d’autras voses, celèbras o anonimas, de luènh o de prèp vengudas: de Villon a Bodon, en passant per Bernat Sicard de Maruèjols, Pèire Cardenal, Antonin Perbòsc, Andrieu Lagarda, Robèrt Martí, Joan Rigosta, Domenica Decamps, Danièla Estèbe-Hoursiangou, Joan-Loís Baradat, Joan-Claudi Forêt, Pere Figueres, e mos pròpris tèxtes, evòcan los secrets d’aquel viatge estranh que vivèm…
Poscatz, al escotar aquestas cançons, conéisser la jòia granda qu’aguèrem a las far !
Eric Fraj
Descobrir Didier Mir : pinturas, e Didier Mir : fotografias